រាជធានីភ្នំពេញ៖ នាថ្ងៃពុធ ១៥ កើត ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី ២៩ ខែកក្កដាឆ្នាំ២០២៦ នេះលោក ជិន ប៊ុនធឿន អភិបាលនៃគណៈអភិបាលខណ្ឌឫស្សីកែវ បានដឹកនាំមន្ត្រីជំនាញ និងអាជ្ញាធរមូលដ្ឋាន ចុះពិនិត្យផ្ទាល់នូវវឌ្ឍនភាពការងារស្ថាបនាផ្លូវបេតុងឆ្អឹងដែក ស្ថិតនៅខាងកើតអមប្រឡាយបាក់ទូក (ក្រុមទី១៤ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ) ដែលជាគម្រោងមូលនិធិអភិវឌ្ឍន៍ខណ្ឌឆ្នាំ២០២៦
ដើម្បីធានាឱ្យបាននូវគុណភាព និងល្បឿននៃការសាងសង់ ឆ្លើយតបទៅនឹងតម្រូវការរបស់ប្រជាពលរដ្ឋនៅក្នុងមូលដ្ឋាន។
ព័ត៌មានលម្អិតអំពីគម្រោងស្ថាបនា៖
ប្រភេទហេដ្ឋារចនាសម្ព័ន្ធ៖ ផ្លូវបេតុងឆ្អឹងដែក
ប្រវែង៖ ២៨០ ម៉ែត្រ
ទទឹង៖ ៨ ម៉ែត្រ
កម្រាស់៖ ០,១៥ ម៉ែត្រ (១៥ សង់ទីម៉ែត្រ)
ទីតាំង៖ ខាងកើតអមប្រឡាយបាក់ទូក ក្រុមទី១៤ ភូមិបឹងសាឡាង សង្កាត់ឫស្សីកែវ
ប្រភពថវិកា៖ គម្រោងមូលនិធិអភិវឌ្ឍន៍ខណ្ឌ ឆ្នាំ២០២៦
ក្នុងការចុះពិនិត្យនេះ លោកអភិបាលខណ្ឌបានរំលឹក និងណែនាំដល់ក្រុមការងារបច្ចេកទេស ក៏ដូចជាក្រុមហ៊ុនទទួលការស្ថាបនា ត្រូវយកចិត្តទុកដាក់ខ្ពស់លើបទដ្ឋានបច្ចេកទេស ដើម្បីឱ្យផ្លូវមួយខ្សែនេះមានគុណភាពរឹងមាំ និងប្រើប្រាស់បានយូរអង្វែង។ ជាមួយគ្នានេះ ផ្លូវបេតុងថ្មីនេះនឹងជួយសម្រួលដល់ការធ្វើដំណើររបស់ប្រជាពលរដ្ឋ លើកកម្ពស់អនាម័យ បរិស្ថាន និងកាត់បន្ថយការកកស្ទះ ឬលិចលង់ដោយទឹកភ្លៀងនាដងផ្លូវផងដែរ។
ប្រជាពលរដ្ឋរស់នៅក្នុងតំបន់នោះបានសម្តែងនូវក្តីរំភើប និងថ្លែងអំណរគុណយ៉ាងជ្រាលជ្រៅចំពោះអាជ្ញាធរខណ្ឌឫស្សីកែវ ដែលបានយកចិត្តទុកដាក់អភិវឌ្ឍន៍ហេដ្ឋារចនាសម្ព័ន្ធមូលដ្ឋានជាបន្តបន្ទាប់។
